英超 勁食大四喜!哈利仔神射手坐凳仔

作者:Dreamy    發表日期:2017-06-03 01:33:02

熱刺周四英超補賽,作客李斯特城。客隊射手哈利卡尼今場食個大四喜,助球隊以6:1大炒狐狸之餘,喺神射手榜仲由第3跳兩級做榜首,好有機會蟬聯英超神射手美譽。雖然聯賽冠軍已經喺車路士手中,但係Top scorer要鬥到煞科先知邊個得到,呢個煞科日千祈唔好錯過呀!

熱刺開賽25分鐘就憑一次突擊,孫興民單騎殺入禁區後傳畀後上嘅卡尼,後者一個撞射搞掂,2哥先開紀錄。李斯特城失波後嘗試反擊,但係唔夠入肉。你追唔番,熱刺又做嘢。36分鐘,客隊喺狐狸禁區頂小組短傳,阿里挑起個波畀孫仔,呢位南韓射手輕鬆射入,將領先優勢拉開到2球。

主隊換邊後推得更前,一度壓住熱刺嚟攻,馬克艾拜頓、馬列斯先後攻門,但係都無功而還。熱刺頂住狐狸狂攻之後,好快就有機會,孫仔轉身窩利抽射,差啲入到個世界波,可惜食唔正斜出。

狐狸喺59分鐘憑招牌反擊,終於追番球,華Dee追隊友傳送同出迎嘅洛里斯炒埋一碟,捷積執漏射穿幾名護空門嘅客隊守將,將比數拉近。

熱刺畀人追番球,4分鐘後撳制搶攻,艾達韋列特右路傳中,雲耶馬喺遠柱頂番去近柱,卡尼門前無人看管,輕鬆頂成3:1,仲追平愛華頓射手盧卡古,齊齊以24球排喺神射手第1位。孫仔71分鐘又嚟,主隊禁區頂配合卡尼走位,一擺呃晒3個狐狸守將,搵到空位遠射,皮球直插死角,個人梅開二度。

客隊最後20分鐘繼續攻,卡尼喺89分鐘完成帽子戲法,兩分鐘後喺差唔多位置食埋大四喜,今仗入4球令到佢追過「魔獸」,以26球成為Solo top scorer。熱刺煞科作客侯城,哈利仔再有士哥唔出奇。至於魔獸要反超前就有難度,因為愛華頓最後一場對手,正正就係有神射手3哥亞歷斯山齊士效力嘅阿仙奴。雖然哈利仔最有機會,但係邊個做神射手,要到最後一刻先知!

熱刺最後以6:1大勝李斯特城,李城可唔可以打入聯賽榜前半版,就要睇下煞科日嘅賽果。

東網體育同你追實體壇每個精彩時刻! 
http://bit.ly/2ecTF2A 


本文來源:http://hk.on.cc/hk/bkn/cnt/sport/20170519/bkn-20170519043730325-0519_00882_001.html




Tag:
本文鏈接:http://www.health852.com/11445.html