愈揭愈萌 柴犬變套娃

作者:Edith    發表日期:2018-09-20 12:47:33

柴犬天生咁得意,自然多人鍾意,故此唔少扭蛋玩具都用柴犬做題材,無論閣下屋企養唔養到汪星人,只要係柴犬粉絲都會一見愛上。最近日系扭蛋品牌EPOCH推出咗「套娃式」嘅柴犬扭蛋,設計靈感到底係嚟自俄羅斯娃娃,或是以同樣原理合體嘅《天威勇士》?無論點都好,論萌力指數,呢Set新扭蛋都冇得輸,唔只用咗增加玩味嘅套娃設計,而且唔係獨沽一味,柴犬本身有大、中、細之分外,黃色嘅大柴犬、黑色嘅中柴犬與啡色嘅細柴犬,都戴上日式頭巾,賣相更加趣緻,而且可以將佢哋一隻套一隻之餘,又可以換上骨頭,都算設計師有花心思。呢Set新扭蛋全套合共六款,各售200日圓,而大、中、細柴犬嘅高度分別係42、27與13mm,抵買之餘又唔阻地方,柴犬鐵粉要留意了。

除了細細隻嘅柴犬,就連大大隻嘅恐龍都成為今期扭蛋界新品,不過唔使驚會阻地方,因為只係頭骨而已。エール最近推出嘅「恐龍博物館第二彈」,全套就有12款恐龍頭骨,分別係暴龍、三角龍、副櫛龍、尼日爾龍、腕龍、樑龍、速龍、偷蛋龍、食肉牛龍、雙脊龍、戟龍與德拉科暴龍,每款售價都係200日圓,雖然長度只有65mm左右,不過雕工都算交到貨,加埋水準不俗嘅舊化塗裝,性價比合格有餘喎。


本文來源:http://hk.on.cc/hk/bkn/cnt/lifestyle/20170709/bkn-20170709170018125-0709_00982_001.html




Tag:
本文鏈接:http://www.health852.com/18412.html